اخر الاخبار

الثلاثاء، 5 يناير 2021

دبابيس من الصحف السودانية

 📌 دبابيس من صحف الثلاثاء 05 يناير 2021م

ه



ه

*همسة*

فاذا صغرت فكن وضيئاً نيراً

مثل اليراعة في الظلام الاسود

فاذا رأيت من الطلاقة بارقاً

فابذل حياتك غير مغلول اليد

وخذ المآرب من زمانك عنوة

والق العريف على الرعاف ولا تد

فاذا ادخرت الى الصباح بسالة

فاعلم بان اليوم انسب من غد

ه

ه

⚠   *اقتراح جديد لنج*:

👈    لفض الاشتباك بين (الجبهة الثورية) و (قحت) في وزارتي الزراعة والثروة الحيوانية نقترح فصل وزارة الثروة الحيوانية نصين نعطي (الجبهة الثورية) النص ال فيه (الثروة) ويكونوا حققوا هدفهم في قسمة الثروة ونعطي النص ال فيه الحيوانية ل (قحت) ؟ فهمتوني 

ه

ه

⚠   *أكبر عملية تزوير للعملة بولاية كسلا*:

👈    تحصلت مصادر  على تفاصيل ضبط السلطات لأخطر عملية تزوير عملة بمصرف المزارع التجارى فرع حلفا الجديدة بولاية كسلا. وكشف مصدر عن توصل السلطات إلى معلومات تؤكد تورط مدير الفرع وبعض الصرافين في إدخال عملات مزيفة للبنك وسحب نقود سليمة حيث بلغ السحب في مرة واحدة لشخص صيني الجنسية  30 مليار وتوالت عمليات السحب عقب انتهاء الدوام الرسمي....... 

https://kushnews.net/2021/01/269392 

📌   عليكم الله اقروا تفاصيل الخبر من الرابط دا عشان تشوفوا نحن وصلنا وين.... 

ه

ه

⚠   *الشيوعي يرفض المشاركة في الحكومة* :

👈   جدد الحزب الشيوعي موقفه الرافض للمشاركة في كل مستويات السلطة، لاستنادها على الوثيقة الدستورية المزورة......

📌   يا مثبت العقل والدين ، هسع الكيزان يقولوا الحكومة حكومة شيوعيين والحكومة تقول الكيزان لسع حاكمين والشيوعي يرفض المشاركة في الحكم ، والعساكر يقولوا الحكومة فشلت والحكومة تقول العساكر متحكمين في كل شي.....  البلد دي في زول سقاه بنقو ؟ ......

ه

ه

⚠   *المخلوع (شاهداً) في قضية (عبد الباسط حمزة)* :

👈   عقدت محكمة جنايات بحري وسط أمس الاثنين الجلسة الثالثة لمحاكمة رجل الأعمال الشهير (عبد الباسط حمزة)، المتهم بالثراء الحرام والمشبوه وغسل الأموال. وكشفت متابعات بحسب صحيفة السوداني الدولية، أن اسم الرئيس “المخلوع” عمر البشير سيرفق ضمن قائمة الشهود في القضية، التي حددت جلسة أمس فيها لسماع أقوال المتحري ومناقشته في البلاغ وحددت جلسة لسماع المبلغ وشهود الاتهام. ويواجه حمزة تهماً تتعلق بالثراء الحرام وغسل الأموال تحت المواد 156/6/57/219/26/75126 من القانون الجنائي و35 من قانون الثراء الحرام.

📌   مسكين بقى زي الساوند سيستم كل يوم خامنو على مكان........ 

ه

ه

📰   الوطن:  

👈   عرمان :الهجوم على القراي تقوده الثورة المضادة

📌    قالوا للثورة المضادة ايه اللي فرعنك قالت لقيت الجماعة حمام ميت 

ه

📰   الوطن:  

👈   كباشي يمثل أمام لجنة تحقيق فض الإعتصام

📌    وحدس ما حدس والا لسع ؟ 

ه

📰   الوطن:  

👈   اضراب عمال مياه ولاية الخرطوم

📌    اول مرة اعرف انهم شغالين 

ه

📰   الوطن:  

👈   رئيس المخابرات المصري بالخرطوم في زيارة مفاجئة

📌    محمد معانا ما تغشانا 

ه

📰   التيار:

👈   وزير التربية : المناهج يضعها خُبراء نشرنا أسماءهم في صحيفة (التيار)

📌    يازول الرجرجة العاملين فيها خبراء ديل الا تدوهم ليها حقنة في العضل 

ه

📰   التيار:

👈   كوستي : إضراب المستشفى يدخل يومه الثالث

📌    بالمناسبة دي مستشفى الولادة اشتغل والا لسع قافل ؟

ه

📰   التيار:

👈   (التيـــار) تســـتنطق مفصولـــي القـــوات المســــلحة

📌    ونطقوا والا لسع ؟ 

ه

📰   التيار:

👈   المُتحرِّي يكشف تفاصيل مُثيرة في مُحاكمة رجل الأعمال عبد الباسط حمزة

📌    عندما يفقد الناس الثقة في التحري والمحاكم لا يكون هناك شي مثير

ه

📰   التيار:

👈   بعد (27 )عامًاً من الحظر..إيداع (148)مليون يورو لوزارة المالية بالسودان

📌    تأبيده عديييل الله لا بارك في من كان السبب 

ه

📰   التيار:

👈   السودان يتحفظ على المشاركة في الاجتماع الثلاثي لسد النهضة

📌    والله أن (يتحفظ) النهار دا أحسن من (يتحفض) باكر ونبقى نفتش في الحفاضات واحتمال ما نلقى مقاسو

ه

📰   الديمقراطي:

👈   وزير التربية : لجنة من المتخصصين لتقييم كتاب التاريخ شكلا ومضمونا

📌    طيب ما كان من الأول وتفكونا من المعط دا 

ه

📰   الديمقراطي:

👈   اختفاء ملف قضية البروفيسور عمر هارون للمرة الثانية

📌    دا ملف والا اب لمبة ؟ 

ه

📰   الديمقراطي:

👈   اليوم انطلاقة المؤتمر الأول لمناهج مرحلتي( المتوسطة والثانوية )

📌    تااااني مناهج ؟ 

ه

📰   الديمقراطي:

👈   الطيران المدني تمدد منع دخول القادمين من ثلاث دول

📌    ماصدقوا لقوا لهم ناس يمنعوهم  

ه

📰   الديمقراطي:

👈   بدء صيانة الطريق القومي (الخرطوم _ كوستي)

📌    ماشاء الله تبارك الله 

ه

📰   الديمقراطي:

👈   السويد ترتب لأقامة مخيمات للاجئين الاثبوبيين بشرق السودان

📌    اشمعنى شرق السودان ما توديهم السويد ؟ 

ه

📰   المواكب:

👈   وزير التربية : الحملة ضد القراي( ضجيج فارغ ) لافشال الثورة

📌    هو في زول بي يسكت عشان يديك فرصة تشوفه فارغ والا مليان 

ه

📰   المواكب:

👈   تجار بسوق ليبيا يتهمون مسؤولين بالفساد ويطالبون باقالة والي الخرطوم

📌    دعس لكم على حتة حساسة والا شنو ؟ 

ه

📰   المواكب:

👈   تجاوزات بتعيين( 70) موظفا في معتمدية اللاجئين

📌    الجماعة قايلين الموضوع عشان بتاع لاجئين مافي زول بي يفتش وراهم 

ه

📰   المواكب:

👈   الكشف عن تعد وبيع أراض سودانية لرجل أعمال جنوبي

📌    يحمد ربه والله ديل لو لموا فيه هو ذاتو كان باعوهو 

ه

📰   المواكب:

👈   ( الحرية والتغيير) تطالب بقرار فوري لألغاء تحرير أسعار الكهرباء

📌    ما كانش يتعز 

ه

📰   الحداثة:

👈   اعتذر المهندس عمر عن حقبية الاتصالات لكن شروط مدنيتها تنتظر التحقيق

📌    مالو ومال الخط المعلق الاتصالات دي لا عسكرية لا مدنية زي ابوالرقيع لامعروف حيوان لا معروف طائر وبعد دا قلى العالم قلي بالكورونا  

ه

📰   الحداثة:

👈   خطة أمنية جديدة (للداخلية) تتضمن تكثيف ( الأطواف وشرطة السواري ) داخل الأحياء

📌    الله يستر ما يدقوا السواري ويقلعوا حصانه 

ه

📰   الحداثة:

👈   بسبب نزاع شركتين حول( كرتة ذهب) مدير شركة الموارد المعدنية ينزع فتيل أزمة كسلا

📌    انتو ناس سيدي الحسن رحلوا من كسلا والا مالها حكايتها فكت كدا ؟ 

ه

📰   الحداثة:

👈   القبض علي المهتمين في حادثة تخريب مستشفي زالنجي

📌    والمتهمين في حادثة تخريب أبراج الكهرباء مافي منهم خبر ؟ 

ه

📰   الانتباهة:

👈   القبض علي سائق وزيرة المالية في حادثة سرقة

📌    أممممك ، يكون ما متعشي 

ه

📰   الانتباهة:

👈   أعادة التحري مع عبدالباسط حمزة بعد شهادة( المعزول)

📌    جاب له هواء ؟ 

ه

📰   الانتباهة:

👈   نبيل أديب: كباشي يحمل الكثير من المعلومات حول قضية فض الاعتصام

📌    معلومات شنو ؟  دا سيد الزيت ذاااتو 

ه

📰   الانتباهة:

👈   لجنة الأطباء تصريحات سكرتير مجلس السيادة تجاوز خطير

📌    معليش يا إخواننا اللواء كان مركب مكنة فريق 

ه

📰   الانتباهة:

👈   بدء تشغيل مستشفي الخرطوم

📌    تاقوا حميدة 

ه

📰   النيل الدولية:

👈   البرهان يلتقي رئيس المخابرات المصرية

📌    ياربي مكتوبه والا شفاهةً ؟ مافي زول يقول لي شنو هي 

ه

📰   النيل الدولية:

👈   برطم : (قوى الحرية والتغيير) جسم هلامي غير حقيقي

📌    من أصدق ما سمعت 

ه

📰   سما نيوز:

👈   الفريق أول محمد حمدان دقلو يناقش مجمل العلاقات الثنائية وسبل دعمها وتطويرها وتعزيز المصالح المشتركة مع الفريق جمال عبد المجيد

📌    الله يجيب العواقب سليمة 

ه

📰   سما نيوز:

👈   أسرة سما نيوز تنعي اللواء معاش حسن عثمان أحمد

📌    له الرحمة والمغفرة وربنا يتقله في الصالحين 

ه

📰   سما نيوز:

👈   والي البحر الأحمر يشيد بالعلاقات والتعاون مع الهند

📌    قول لهم لو عندكم مشتري لي كرسي الصحة الأبدية بتاع المخلوع نحن بايعين 

ه

📰   أخبار اليوم:

👈   فتح الأجواء والحدود البرية والبحرية بين السعودية وقطر.

📌    ليبيا الجد جد فتحت 

ه

📰   أخبار اليوم:

👈   الجيش الإثيوبي يمنع اللاجئين (التقراي) من الفرار إلى السودان.

📌    فخار يكسر بعضه 

ه

📰   أخبار اليوم:

👈   زعيم البعث: الشعب سيتحمل عبء تنفيذ ميزانية 2021.

📌    الشعب فقد الإحساس أردموا ساااي لحدي ما يقع ويرتاح منكم 

ه

📰   السوداني:

👈   “حمدوك” يلتقي مدير المخابرات العامة المصرية

📌    هو دا اظنو شايل كراسته وحايم زي بتاع الإحصاء 

ه

📰   السوداني:

👈   وزير التربية: حماية الدين وثوابت الأمة أسطوانة مشروخة سئم الشعب من سماعها

📌    والله ياخي معاك حق ، كرهونا الثوابت ذاتها 

ه

📰   السوداني:

👈   إيقاف إقامة المناسبات بالمزارع والمنتجعات بالخرطوم

📌    الجنبات الجنبات كيف ؟ 

ه

ه

📌ابووضاح 📌

ليست هناك تعليقات:

إرسال تعليق

Adbox