" *حواشي و متون من كتاب حرب الخرطوم.. رحلة الستين يوم 7_150"*
رصد و متابعة : حمدي صلاح الدين
" *كركوج و الحديبة* "
أثناء طوافي في مدينة ود مدني تلقيت دعوة من اخي و صديقي و جاري محمد يوسف لزيارة منطقتي كركوج "15 كيلو متر من ود مدني" و الحديبة "25 كيلو متر من ود مدني" حيث توجد مدرسة تستضيف عدد من الفارين من جحيم حرب الخرطوم.
يممنا وجهنا شطر منزل عمنا الباشمهندس الناجي بكركوج حيث زرنا منه مركز الإيواء بمدرسة كركوج الأساسية للبنات و بعدها زرنا الحديبة في ضيافة الباشمهندس يوسف والد الأخوان محمد و أسامة و بكرى فللاسرتين كل الشكر على التفاعل الكبير مع قضايا الفارين من جحيم الحرب و الدعوة لزيارة مركز الإيواء بالمنطقة .
و بحسب روايات شباب اللجان التي تكونت في مدني و ضواحيها فإن أفواج الفارين من الحرب في الخرطوم كانت تصل على مدار الساعة ما بعد عيد الفطر المبارك شهود عيان اكدوا ان عديدين التحفوا مساطب السوق الشعبي و ظلال الأشجار في وقت عملت فيه مجموعات لتجهيز المدارس و المراكز و الأندية و دور الاحزاب.
الحالات الخاصة كانت كثيرة في مدني و ضواحيها مرضى سرطانات، مرضى فشل كلوي، زارعي كلي و نساء على وضوع و كلها تحتاج تنسيق و ترتيبات مع الاطباء و المستشفيات.
في كركوج ، 15 كيلو من مدني ، أقام 135 فردا في مدرسة و استضافت 8 أسر عدد من القادمين من الخرطوم في المنازل .
زرت الأسر في مدرسة كركوج و تحدثت الي الخالة فاطمة، تعمل بالمدرسة، و التي قالت : اتصل بي اقاربي من حي مايو بالخرطوم قالوا الضرب كتر عليهم طالعين جايين مدني قلت ليهم حبابكم. كلمت شباب المقاومة و التغيير كتر خيرهم استقبلوا اهلي و وفروا لينا مواد تموينية و علاجات و جابوا دكاترة قاسوا الضغط و السكري للعيانين.
و قال شباب التغيير و الخدمات بكركوج : ابلغتنا الخالة فاطمة بقدوم اهلها و جيرانها، تحدثنا في مساجد الحلة عن فتح المدرسة لأهلنا من الخرطوم. المساجد رحبت و تبرع المصلون من اهل المنطقة لتوفير المواد التموينية للقادمين من الخرطوم، و قام الأطباء بمتابعة حالاتهم باستمرار و تم توفير أدوية الضغط و السكر للمرضى منهم.
فاطمة، إحدى القادمات من الخرطوم إلى كركوج، قالت : الضرب زاد علينا اليوم كلو نحن تحت السراير، طلعنا السوق المركزي لقينا دفار طالع مدني ركبنا فيهو انا و جاراتي. الحرب دورت تاني قبل ما نطلع من الخرطوم سمح، الدفار نزل من الشارع دخل حلة ما عارفة اسمها قعدنا ساعات تاني طلعنا الزلط وصلنا كركوج يوم العيد بالليل و ياهو نحن لسه قاعدين. ناس المنطقة ما قصروا معانا و الله و شباب التغيير و الخدمات كل يوم يزورنا صباح مساء يشوفوا ناقصنا شنو.
محدثي بابكر محمد الفاتح بابكر، عضو
لجنه الخدمات والتغيير بمنطقة كركوج، يقول : مدرسة كركوج للأساس بنات استضافت 35 أسرة عدد افرادها 135 فرد من قبل عيد الفطر و حتى الآن المدرسة تستقبل العديد من الأسر و يضيف بابكر ان اهل المنطقة لم ينقطعوا عن دعم مركز الإيواء المقام في المدرسة بالقمح و السكر و الذرة و البصل و العدسية و الأسرة و المراتب إضافة إلى مبالغ مالية قدمها عدد من اهل المنطقة لدعم مركز الإيواء و يضيف بابكر، بعض الوافدين كانوا بحاجة إلى رعاية طبية فكان من ضمن الوافدين 3 من الحوامل على وضوع و الحمد لله تم توفير رعاية صحية كاملة حتى وضعت النساء الثلاثة في مواقيت مختلفة و كان هناك حالة خاصة "زارع كلي" تم توفير كل العلاجات له بمحهودات اهل المنطقة و يضيف بابكر ، كل الأسر القادمة من الخرطوم موجودة في منطقة كركوج حتى الخميس 22 يونيو 2023م "لحظة تقديم الإفادة للجريدة"
#حواشي_ومتون_حرب_الخرطوم
#اتحاد_مغردي_السودان
ليست هناك تعليقات:
إرسال تعليق